احدث تشكيلة دبل وخواتم الخطوبة :ازاي تختاري دبلة الخطوبة
هاااااااي يا بنات يا حلوين هنتكلم النهاردة مع البنات اللى دخلة على خطوبة وجواز
بما اننا فى موسم اعراس وخطوبة والبنات الحلوين اللي رايحين يشترو الشبكة
و طبعا الدهب غالى نار .والاسعار ايه انتى عارفة
وتتفاجئى بخطيبك حبيبك داخل عليكى بوردة حمرة ولا دبدوب تعرفى على طول انك هتتثبتى يا مزة.
يقلى بقى انتى عارفة الظروف ولسه الشقة والفرح والمصاريف ...... خلينا نكتفى بخاتم ودبلة وبكرة بعد الظروف متتحسن هجبلك اللى تحلمى بيه والكلام الللى مبيجبش همه ده الللخ الللخ ......
,يعنى بصراحة كدة انسي الشبكة اللى بتحلمى بيها و طبعا انتى لسة هبلة وفى مرحلة دا حبيبي ولازم اساعده
يلا مش مشكلة بكرة تكبرى وتاخدى عل دماغك نيجى لموضعنا الاصلى لما تروحي تشترى الدبلة والخاتم
شوفى ياستى شوية نصايح لازم لازم تعمليها .ايه هيا بقى
1- قبل ما تروحي تشترى الشبكة باسبوع اعملى كبسة على جميع صحباتك المخطوبين واللى لسه متجوزين عشان تشوفى شبكتهم .اه خليكى ناصحة شوفى اشيك خاتم ودبلة وصحصحى كده و خليكى واعية
عشان متجيش فى الاخر تلاقى اللى تقلي والنبى دبلتك جميلة ......بس دبلة سهام بنت خالتك اشيك ...........ولا صحبتك منال ذوقها احلى منك خاتم شبكتها تحفى
فانتى احتياطي صوريهم كلهم ولما تروحي للجواهرجى قارنى براحتك
2- يوم الشبكة اعزمى كل صحباتك وخالتك وعمتك واوعى تنسى بنت خالة امك عشان متزعلش
اه خدى بالك ليستفرض بيكى . هيختار اصغر خاتم ودبلة ويبصلك فى عنيكى ويسبل ويقلك شوفي يا حببتى الشياكة ده حتى شكله رومانسى
فانتى اعملى حسابك وخدى كتيبة معاكى وسبليله انتى :يا حبيبي دول هما اللى صممو ييجو معايا وانا مهانش عليا ازعلهم
3- اوعي تتسرعى براحتك خالص وميهمكيش من حد
خطيبك وشه يقلب .ابوكي يزغرلك .امك تهزقك ولا يهمك
سوقى فيها تناحة واختاري براحتك الدبلة عشان هتتدبسي فيها كل حياتك وان حبيتي تغيرها مش هينفع . هتلاقى اللى بيقلك حد بيغير دبلة الخطوبة دا انتى مفتريه.
4-اوعى حد يفرض عليكى حاجة . شوفى ايه اكتر خاتم عجبك وعادة اول حاجة بتعجبك هو انسب حاجة
ركزى ركزى ركزى انا اقلتك وانتى حرة دى شبكتك انتى مش حد تانى لازم تكونى مقتنعة بيها الف فى المية عشان مترجعيش تندمى
5- نصيحة منى بقى اختاري مقاس الدبلة او الخاتم مقاس أكبر قليلا من مقاس صباعك
طبعا هتقولى اشمعنا . هقلك لاننا احنا الستات بعد الجواز بينزل علينا كرم من ربنا ونتخن بعد الجواز فانت اعملى حسابك من الاول
6- اخر حاجة اختارى اجمل حاجة واغلى حاجة
كدة كدة هيزعل بس يومين وهينسى بس الدبلة والخاتم هيفضلو معاكى طول العمر دا اذا مجاش بعد الفرح وقلك عليا ديون كتير ونبيعهم ونسدد وتقضيه انتى بالصينى اهو ارخص واشيك
الوقت بقى جمعتلك شويه خواتم ودبل يمكن تعجبك:
ليست هناك تعليقات:
إرسال تعليق